Dr Thangtea hian Chhippui khuaah ZPM aṭangin voter 9 MNF-ah a lawm luh thu vawiina MNF thuchhuah chuan a tarlang.

MNF Sr Vice President chuan, "Kawng hrang hrangin Mizoramah Mizo Nationalism-in beih a tawk mek a. Ram leh hnam humhalhna kawnga beidawng tawh leh hnung lam hawi tawhte MNF-ah lo let leh turin kan sawm che u a. Neutral tam tak hnam veitu in awm tih kan hria a, ram leh hnamin a chhung aṭang ngei a beih a tawh mek lai hian lo penchhuak a, lo haw khawm turin ka sawm che u a ni," a ti.  

Dr Thangtea chuan khaw hrang hrangah thusawiin, "MNF-in kan hum ngai kan luah leh hi a ngai a ni. Party angin kan MLA Pu Rintluanga Sailo thihna hi kan sun a, a hmangaih a bial mipuite hian Pu Rintluanga chhungte leh MNF mittui luang mek hi min hnem turin kan ngen a ni" a ti a. "ZPM hi he bialah hian tling leh ta se sorkarah thil danglam em em a awm dawn lo a. Sorkar-ah dinhmun pawimawh zawng zawng an luah khat vek tawh a ni. Chuvangin, Dampa bial mipuite in vote hlu tak kan dil che u a, Pathian leh kan ram tan nghet takin kan ding dawn a ni," a ti bawk.

Lalrintluanga Sailo nupui Lalbiakṭhuami pawhin khaw hrang hrangah thusawiin, "Kan pa khan he bial tan hian hnathawh zawh loh leh hmachhawp tam tak a nei a, chu'ngte chhunzawm tur chuan Dr Thangtea hi kan ring tawk a ni. Kan pa khan a hmangaih che u a, a lainat che u a, a ngaihsak che u a ni. A ngaihtuahna zawng zawngin he bial hmasawnna tur hi a ngaihtuah ṭhin. Chutiang bawkin nangni pawhin in hmangaih tih ka hria a, kan lawm a ni. Amah a awm tak si lohah chuan by election neih a lo ngai ta a. Dr Thangtea hi kan pain unaupa ang chiaha a en a ni a, in vote hlu tak Dampa mipuiin lo hlan turin ka ngen che u a ni," a ti.